ليه المتهم في التحقيقات بيقول إجابات نموذجية زي
محصلش ،، معرفش ،، مش فاكر ؟
= عشان الأصل في المتهم البراءة وطالما في إتهام يبقى النيابة العامة هي المكلفة بإقامة الدليل على إتهامه .. يعني مفيش اي غلط عليه لما يمتنع عن الإجابة او يقول محصلش
- هل سكوت المتهم ممكن يتاخد ضده ؟
= لا .. صمت المتهم لا يؤخذ ضده كدليل وبالتالي لا يعتبر خطر عليه أما الكلام هو اللي بيكون أحيانا ضده
- صحيح المحامي ملوش دور في التحقيق ؟
= المحامي مش بيكون له دور ظاهريا يعني بيحضر التحقيق بس مش بيتدخل فيه .. مينفعش تبص للمحامي وتستنى منه يلقنك إجابة مثلا ... بس في نفس الوقت وجود محاميك معاك ضمان لسير التحقيق بشكل قانوني وبطريقة تحافظ على حقك وتقدر تقول قبل بداية التحقيق ان ليك محامي اسمه كذا وانك متمسك بحضوره معاك التحقيق
- تنصحي المتهم بإيه بخصوص أقواله
= انصحه ميتكلمش كتير ويسأل عن سبب القبض عليه وميخليش اي حد يجره في مناقشة مهما كانت طالما هو مستني التحقيق أو في بدايته